Ministri gjerman i financave, Christian Lindner, u përball të hënën me mijëra fermerë që protestojnë kundër rritjes së taksave dhe tha se nuk kishte më para për subvencionimin e tyre. Berlini thuajse ka ngrirë nga demonstrimi, që ka parë një prej shesheve qendrore të qytetit të mbushet me kamioncina e traktorë ndërsa rreth 10 mijë fermerë u mblodhën në protestë. “Nuk mund t’ju premtoj më shumë ndihma shtetërore nga buxheti federal”, u tha Lindner fermerëve në mesin e të ftohtit në portën e Brandenburgut. “Por, ne mund të luftojmë së bashku për ju që të gëzoni më shumë liri dhe respekt për punën tuaj”. Protestat kanë shtuar presionin mbi koalicionin e kancelarit olaf Scholz ndërsa përpiqet të rregullojë problemet në buxhet dhe të vendosë nën fre grupet e të djathtës ekstreme. Protestat nisën pas një vendimi të qeverisë për ti dhënë fund heqjes së taksës mbi karburantin për përdorim bujqësor, në kuadër të balancimit të buxhetit të vitit 2024, pas një vendimi të gjykatës kushtetuese në nëntor që e detyroi atë të rishikonte planet e shpenzimit. Protesta e fermerëve ka shkaktuar jo pak probleme në Berlin, me disa linja autobusësh dhe tramvajesh të mbyllura dhe me rreth 1300 oficerë policie në patrullim. Problemet e shkaktuara nga protestat dhe greva e trenave, javën e kaluar, ka dëmtuar koalicionin në pushtet në zgjedhje dhe ka bërë që alternativa për gjermaninë, e të djathtës ekstreme të shënojë rritje.