Komisioni i Pavarur i Kualifikimit edhe pse nuk gjeti asnjë problem në karrierën e prokurorit të Tiranës, Bledar Maksuti, e shkarkoi atë për mungesë burimesh në pasurinë e krijuar nga babai i tij i ndjerë. Këto parregulësi u vendosën në pah edhe nga vëzhguesja ndërkombëtare, Elka Ermenkova në seancën dëgjimore të zhvilluar më 9 prill. Ndërkohë Komisoni konstatoi pasaktësi në deklarime dhe mungesë burimesh për pasurinë e krijuar nga babai i Maksutit, ish prokuror, noter dhe avokat. Prokurori tashmë i shkarkuar u vlerësua pozitivisht për pastërtinë e figurës dhe profesionalizmin. Procesi i vetingut për të u krye nga trupi gjykues i kryesuar nga Suela Zhegu, me relatore Genta Tafa Bungo dhe anëtar Lulzim Hamitaj. Bledar Maksuti e ka filluar karrierën në sistemin e drejtësisë si oficer i policisë gjyqësore dhe e ushtron funksionin e prokurorit prej vitit 2008.