Ushtria e Koresë së Jugut është zvogëluar për 20 për qind gjatë gjashtë vjetëve të fundit, dhe tani ka 450.000 trupa, kryesisht për shkak të një rënie të ndjeshme të numrit të meshkujve në moshën e rekrutimit për shërbim të detyrueshëm ushtarak, sipas një raporti të publikuar të dielën. Koreja e Jugut e ka normën më të ulët të lindshmërisë në botë. Rënia dramatike e numrit të meshkujve të gatshëm për shërbim ushtarak po shkakton gjithashtu mungesë të oficerëve dhe mund të sjellë vështirësi operacionale nëse vazhdon, thuhet në raportin e Ministrisë së Mbrojtjes së Koresë së Jugut. Ushtria e Koresë së Jugut ka qenë në rënie të vazhdueshme që nga fillimi i viteve 2000, kur kishte rreth 690.000 ushtarë. Ritmi i rënies u përshpejtua në fund të viteve 2010, dhe në vitin 2019 kishte rreth 563.000 ushtarë e oficerë aktivë. Mendohet se Koreja e Veriut ka një ushtri aktive prej rreth 1.2 milionë trupash, sipas vlerësimit të fundit të Ministrisë së Mbrojtjes në vitin 2022.