Ministri i Jashtëm rus Sergei Lavrov tha të enjten se të gjitha "keqkuptimet" me Shtetet e Bashkuara të amerikës për Ukrainën ishin zgjidhur pas një takimi në fillim të këtij muaji mes Presidentit Vladimir Putin dhe të dërguarit të SHBA-së Steve Ëitkoff. Kremlini vlerësoi takimin e 2 dhjetorit me Ëitkoff dhe Jared Kushner si "konstruktiv", megjithëse nuk u arritën përparime të mëdha për të zgjidhur luftën në Ukrainë. Lavrov tha të enjten se bisedimet kishin konfirmuar "mirëkuptimin e ndërsjelltë" të arritur mes Putinit dhe Donald Trump në një samit në Alaskë në gusht. "Tani, këtu, në negociatat tona me amerikanët për çështjen e Ukrainës, unë personalisht besoj se keqkuptimet dhe keqkomunikimet janë zgjidhur", tha ai. Lavrov shtoi se Rusia dëshiron një paketë dokumentesh të dakordësuara për të mbështetur një marrëveshje paqeje afatgjatë dhe të qëndrueshme në Ukrainë me garanci sigurie për të gjitha palët e përfshira.