Ministri i Jashtëm francez, Stéphane Séjourné nuk shikon përçarje mes Berlinit dhe Parisit pavarësisht dallimeve mes presidentit francez, Emmanuel Macron dhe kancelarit gjerman, Scholz. Në një intervistë të tij për gazetën franceze, "Le Monde" theksohet se nuk ka ndarje mes Gjermanisë dhe Francës në lidhje me Ukrainën. "Nuk ka konflikt gjermano-francez, ne jemi dakord për 80% të temave", tha Séjourné për "Le Monde". Më tej Stéphane Séjourné ka theksuar, se ka biseduar me kolegen e tij gjermane, Annalena Baerbock dhe se të dy do takohen të martën në Paris. "Ekziston vullneti që të flasim me njëri-tjetrin." Gjermania dhe Franca kanë të "njëjtin qëllim, që të mbështesin Ukrainën", tha ministri i Jashtëm francez. "Nuk ka dramë" këtu. Pikë e dukshme mospajtimi mes Gjermanisë dhe Francës është në këtë kohë ndihma që i jepet Ukrainës të sulmuar nga Rusia. Në një konferencë ndërkombëtare për Ukrainën të hënën e kaluar, Macroni kishte tërhequr vëmendjen për vende që ishin të rezervuara për të furnizuar Ukrainën me armë të rënda, dhe me këtë i ishte referuar hezitimit gjerman për furnizimin me armë në fillim të luftës. Përtej kësaj, Macron tha se nuk duhet të përjashtohet as mundësia e dërgimit të trupave perëndimore në Ukrainë. Kjo u prit me refuzim të plotë në Europë. Kancelari Scholz foli qartë kundër dërgimit të trupave perëndimore në Ukrainë. Ministri i Jashtëm francez, Séjourné i hodhi poshtë vlerësimet,se debati për prezencën ushtarake në Ukrainë ka motive zgjedhore. Në qershor zhvillohen zgjedhjet për Parlamentin Europian. "Çështja është ekzistenciale. – tha ministri duke theksuar se "do të preferonte që të kishte një konsensus të gjerë."