Bosi i aeroportit më të frekuentuar në botë për pasagjerët ndërkombëtarë ka thënë se pasaportat e Covidit janë e vetmja mënyrë për të rifilluar udhëtimet masive. Shefi ekzkeutiv i aeroporteve të Dubait, Paul Griffiths, thotë se nuk mendon se ka alternativë tjetër. Kritikët e sistemeve digitale argumentojnë se ato diskriminojnë të gjithë ata që nuk munden të vaksinohen. Por Grifiths thotë se ai është një mbështetës i plotë i dokumentit, që sipas tij, është i paevitueshëm. “Unë mendoj se problemi nuk është pasaporta e vaksinimit dhe diskriminimi i mundshëm. Nevojitet që procesi i imunizimit të jetë më i gjerë në shkallë globale”, thotë ai. OBSh dhe këshilli botëror i udhëtimeve dhe turizmit janë mes atyre që kanë kundërshtuar pasaportat e vaksinave në mesin e frikës se ato do të krijonin një shoqëri në dy standarte. Muajin e shkuar, Mike Ryan, nga OBSH, përsëriti shqetësimet për etikën e lëshimit të pasaportave të vaksinës. “Ato duhen menduar mirë, vecanërisht në një botë ku vaksina është e shërndarë në një mënyrë shumë të pabarabartë”, tha ai. Industria e aviacionit ndërkohë po kërkon në mënyrë të dëshpëruar mënyra për tu ringritur pas dëmeve të pësuara nga kufizimet e qeverive dhe rënia e besimit të pasagjerëve.