Pas arrestimit të Behar Bajrit kanë reaguar edhe autoritetet franceze. ‘Franca nuk është dhe nuk do të jetë strehë për mafian shqiptare’-thuhet në reagim. Në dosjen hetimore të operacionit “Metamorfoza” u fundos grupi kriminal, ku mes tyre ishte edhe Behar Bajri, i cili kishte planifikuar që të vriste Ibrahim Licin dhe Genc Tafilin. Ai po mbahet në qendrën e paraburgimit të Strasburgut, në pritje të ekstradimit të tij në Shqipëri. Sipas informacioneve të publikuara nga mediat franceze, Bajri kishte aplikuar për azil që në vitin 2021 në Francë, por kjo kërkesë iu refuzua nga autoritetet atje. Media franceze “Europe 1”, e konsideron 43-vjeçarin Bajri, kreun e një klani kriminal shqiptar. Ai dyshohet gjithashtu se është përfshirë në atentatin e një prej rivalëve të tij në Shkodër në veri të Shqipërisë në gusht 2020.