Familja dhe mbështetësit e Aleksei Navalnyt, vazhdojnë të kërkojnë marrjen e trupit të kritikut të kremlinit ndërkohë që ata që bëjnë homazhe për të, po arrestohen. Autoritetet ruse thanë të premten se Navalni vdiq në një burg në Arktik. Gazeta me bazë në Letoni, Novaya Gazeta, tha një ditë më parë se policia është duke ruajtur një morg lokal në qytetin siberian Salekhrad, ndërkohë që rriten spekulimet për ngjarjen. Familja e Navalnyt dhe ndihmës të tij të ngushtë, kanë konfirmuar vdekjen e tij në burg, dhe kanë kërkuar që t’iu dorëzohet trupi, por autoritetet kanë refuzuar kërkesën duke u thënë avokatëve dhe nënës së tij, se “hetimet” për shkakun e vdekjes do të përfundojnë brenda javës. Faqja Mediazona, ka raportuar ndërkohë se kamerat afër burgut të ashpër të Arktikut, të quajtur “Ujku polar”, kanë fiksuar katër makina që besohet se e kanë transportuar trupin e Navalnyt. Të tjera media raportojnë duke u bazuar në burime anonime se në trupin e navalnit ka shenja mavijosjeje. E veja e Navalnyt, Yulia Navalnaya, do të takohet ndërkohë të hënën në Bruksel me ministra të Jashtëm të Bashkimit Evropian. Shefi i diplomacisë së BE-së, Josep Borrell, është zotuar se “ministrat e BE-së do të dërgojnë mesazh të fuqishëm të mbështetjes për luftëtarët e lirisë në Rusi dhe do të nderohet kujtimi për Aleksein”. Që kur u bë publik lajmi për vdekjen e tij, policia ruse ka rrethuar disa zona ku njerëzit kanë ndezur qirinj dhe kanë vendosur lule, në nderim të Navalnyt. Policia ruse ka shpërndarë ndërkohë mbështetësit dhe ka arrestuar më shumë se 400 persona në të paktën 36 qytete. Presidenti rus, Vladimir Putin nuk e ka përmendur Navalnyn deri më tani dhe as vdekjen e tij. Perëndimi e ka dënuar Putinin dhe administratën e tij, ndërsa presidenti amerikan, Joe Biden, tha se “nuk ka asnjë dyshim” që Putin duhet të fajësohet për vdekjen e Navalnyt.