Pekini ka mohuar se i ka dhënë armë vdekjeprurëse ndonjërës palë në luftën në Ukrainë, pasi presidenti ukrainas, Volodymyr Zelensky, pretendoi se ka “informacione” se Kina po furnizon me armë Rusinë. “Pala kineze asnjëherë nuk ka ofruar armë vdekjeprurëse për ndonjërën palë në konflikt dhe në mënyrë të rreptë kontrollon mjetet me përdorim të dyfishtë”, tha zëdhënësi i Ministrisë së Jashtme kineze të premten. Zelensky nuk dha detaje për akuzat e tij ndaj Kinës, por vetëm tha se Kievi është “i gatshëm” të bisedojë në detaje për këto pretendime. Javën e kaluar, presidenti ukrainas tha se Kievi ka dijeni se të paktën 155 shtetas kinezë janë dislokuar për të ndihmuar Moskën në luftën kundër Ukrainës dhe pretendoi se ushtria ukrainase ka kapur dy ushtarë kinezë në rajonin lindor të Donjeckut. Pekini tha të premten se qëndrimi i tij ndaj çështjes së Ukrainës është konsistent dhe i qartë: “Ne vazhdimisht kemi bërë përpjekje për ndaljen e armiqësive dhe për bisedime të paqes”, tha zëdhënësi. Kina e ka paraqitur veten si një palë neutrale lidhur me luftën trevjeçare në Ukrainë, pavarësisht kritikave të qeverive perëndimore se përmes lidhjeve të saj të ngushta me Rusinë i ka dhënë Moskës ndihmë të rëndësishme ekonomike dhe diplomatike.