Presidenti i Ukrainës, Volodymyr Zelensky, e kundërshtoi të shtunën takimin e planifikuar mes presidentit amerikan, Donald Trump, dhe presidentit rus, Vladimir Putin, duke paralajmëruar se çfarëdo marrëveshje për paqe pa Kievin do të prodhojë “zgjidhje të vdekura”. Takimi që do të mbahet të premten në Alaskë, shihet si përparim i mundshëm pas javësh zhgënjimi për mungesën e veprimeve për të ndaluar luftimet. Në një deklaratë të postuar në Telegram, Zelensky tha se integriteti territorial i Ukrainës, i përcaktuar në Kushtetutë, nuk mund të jetë pjesë e bisedimeve dhe theksoi se paqja e qëndrueshme duhet ta përfshijë edhe zërin e Ukrainës në tryezë e bisedimeve. Zelensky tha se Ukraina “nuk do t’ia japë Rusisë asnjë shpërblim për atë që ka bërë” dhe se “ukrainasit nuk do t’ia japin tokën e vet pushtuesit”. Duke iu referuar shqetësimeve të ukrainasve se një takim i drejtpërdrejtë mes Putinit dhe Trump mund të anashkalojë Kievin dhe interesat evropiane, Zelensky tha: “Çdo zgjidhje që është pa Ukrainën, është njëkohësisht zgjidhje kundër paqes. Ato nuk do të sjellin asgjë. Janë zgjidhje të vdekura, nuk do të funksionojnë kurrë”. Zyrtarë ukrainas më parë i kishin thënë privatisht agjencisë Associated Press se Kievi do të ishte i hapur për një marrëveshje për paqe që në mënyrë faktike do ta pranonte paaftësinë e Ukrainës për t’i rimarrë ushtarakisht territoret e humbura. Takimi trump putin shihet si një mundësi e madhe për ti dhënë fund një lufte që nisi më shumë se tre më parë. Por sidoqoftë, nuk ka asnjë garanci se ai do të ndalojë luftimet pasi Moska dhe Kievi kanë shumë mospajtime për kushtet e paqes. Duke folur për gazetarë në Shtëpinë e Bardhë, para se të konfirmonte datën dhe vendin e takimit, Trump la të kuptohej se çdo marrëveshje do të përfshinte “shkëmbimin e disa territoreve” por nuk dha hollësi.