Ndërsa Donald Trump kërcënon publikisht se do t'i bashkohet Izraelit në luftën ndaj Iranit, një koalicion i papritur ligjvënësish amerikanë ka ndërmarrë hapa për të parandaluar presidentin nga përfshirja e forcave amerikane në konflikt pa miratimin e Kongresit. Të martën, kongresmeni republikan Thomas Massie, politika e të cilit shpesh e ka vënë në kundërshtim me Trumpin, u bashkua me disa ligjvënës demokratë për të paraqitur në Dhomën e Përfaqësuesve një rezolutë për fuqitë e luftës që do të kërkonte një votim nga Kongresi përpara se Trump të mund të sulmonte Iranin. Demokrati Tim Kaine ka prezantuar legjislacionin shoqërues në Senat. "Kjo nuk është lufta jonë. Por nëse do të ishte, Kongresi duhet të vendosë për çështje të tilla sipas Kushtetutës", shkroi Massie në platformën X. Demokratët Ilhan Omar dhe Alexandria Ocasio-Cortez u përgjigjën "duke nënshkruar" rezolutën, ndërsa zyra e Massie njoftoi më vonë se disa të tjerë, përfshirë kryetarin e Grupit Progresiv të Kongresit, Greg Casar, do ta mbështesnin atë po ashtu. Prezantimi i rezolutës erdhi disa orë pasi Trump u largua më herët nga një samit i G7 në Kanada për t'u kthyer në Uashington DC dhe për të kërkuar "dorëzimin pa kushte" të Iranit pas ditëve të sulmeve ajrore izraelite që kanë patur në shënjestër udhëheqësit e lartë ushtarakë dhe objektet bërthamore të iranit. Shtëpia e Bardhë më vonë mohoi raportet e medias që qarkullonin se SHBA-të kishin vendosur të përfshiheshin në konflikt, me zëdhënësin Alex Pfeiffer që tha: "Forcat amerikane po mbajnë qëndrimin e tyre mbrojtës dhe kjo nuk ka ndryshuar. Ne do të mbrojmë interesat amerikane." Megjithatë, avionët dhe anijet detare ushtarake amerikane janë zhvendosur në Lindjen e Mesme dhe objektet më të thella bërthamore të Iranit mendohet se janë të depërtueshme vetëm nga një bombë shkatërruese bunkerësh që e zotëron vetëm SHBA. Trump bëri fushatë për mbajtjen e SHBA larg luftërave të huaja dhe fundjavën e kaluar, JD Vance u tha trupave të ushtrisë në një paradë ushtarake në Uashington DC: "Ne kurrë nuk ju kërkojmë të shkoni në luftë nëse nuk jeni absolutisht të detyruar".