Intervista që presidenti rus Vladimir Putin, i dha gazetarit amerikan Tucker Carlson, është pritur me një mori reagimesh ndërkohë që ishte intervista e parë e tij me një gazetar perëndimor që nga pushtimi i Ukrainës në shkurt 2022. Vetë gazetari Carlson, është jo pak i polemizuar, ndërkohë që shumë analistë janë shprehur pas intervistës se ai i dha Putinit një platformë për të derdhur lirisht propagandën e tij. Dhe ndërsa foli për më shumë se 30 minuta për historinë e lavdishme të rusisë, në një lloj monologu, Putin, u ndal edhe tek lufta në ukrainë dhe cështje të tjera. Një ndër to, edhe Serbia...Ai, si aleat i presidentit serb, Aleksandër Vucic, bëri të qartë se Rusia është në krah të serbisë dhe se do ta mbrojë atë. “Rusia nuk mundi të ngrihej në mbrojtje të Serbisë në vitet 1990, është koha që ligji ndërkombëtar të ndryshojë, sepse balanca e fuqisë në botë ka ndryshuar”, tha presidenti rus në intervistë. Sipas Putin, ndërhyrja e NATO-s dhe bombardimi i Beogradit, ishte momenti kur amerikanët nxorrën xhindin nga shishja. “A ju kujtohen zhvillimet në Jugosllavi. Boris Jelcin (presidenti rus) ngriti zërin në mbështetje të serbëve. E kuptoj se ishin procese komplekse që ndodhnin atje. Serbët janë për ne popull special dhe i afërt me kulturë ortodokse. Është një komb që ka vuajtur kaq shumë për gjenerata me radhë. Nejse, çfarë është e rëndësishme, është që Jelcin dha përkrahjen e tij, por çfarë bënë SHBA-të? Në shkelje të ligjit ndërkombëtar dhe Kartën e Organizatës së Kombeve të Bashkuara bombarduan Beogradin. Ishin SHBA-të që nxorën xhindin nga shishja”, tha Putin duke shtuar se kur rusia protestoi për këtë veprim, dhe shprehu pakënaqësin e saj, iu tha se ligji ndërkombëtar dhe kartat e OKB-së ishin të pavlefshme. Ndërkohë- tha putin – tani të gjithë i referohen ligjit ndërkombëtar.