Ministri kinez i Mbrojtjes, Li Shangfu, paralajmëroi të dielën kundër krijimit të aleancave ushtarake të ngjashme me NATO-n, në rajonin e Azi-Paqësorit, duke thënë se diçka e tillë mund ta përballë këtë zonë me një “vorbull” konflikti. Komentet e tij erdhën një ditë pasi anijet e ushtrisë amerikane dhe asaj kineze, lundruan pranë njëra-tjetrës afër Ngushticës së Tajvanit duke shkaktuar madje edhe një incident pasi luftanija kineze i preu rrugën asaj amerikane. Ky incident ka provokuar zemërim te të dyja palët. “Tentativat për të krijuar aleanca të ngjashme me NATO-n në Azi-Paqësor, janë një mënyrë për të marrë peng shtetet rajonale, dhe për të nxitur konflikte dhe përballje”, tha ministri kinez në një konferencë të sigurisë që po mbahet në Singapor.