Irani ka arrestuar më shumë se 1.000 persona që nga fillimi i protestave, sipas Agjencisë së Lajmeve të Aktivistëve të të Drejtave të Njeriut, HRANA, megjithëse numri i saktë mbetet i vështirë për t’u verifikuar pasi demonstratat vazhdojnë në të gjithë vendin. Diako Alavi, një gazetar me bazë në Paris tha për Radion Evropa e Lirë se konfirmimi i numrit të të ndaluarve gjatë protestave është “jashtëzakonisht i vështirë”, dhe vuri në dyshim besueshmërinë e deklaratave zyrtare dhe akuzave të ngritura ndaj të ndaluarve. Burime në teheran thanë se rreth 40 apo 50 persona po ndalohen çdo ditë. Raportet në rrjetet sociale tregojnë se disa arrestime u kryen gjatë protestave në rrugë, ndërsa të tjera duket se përfshinin ndalime të rastësishme nga forcat e sigurisë. Kreu i gjyqësorit, Golamhossein Mohseni-Ejei, akuzoi ndërkohë Shtetet e Bashkuara dhe Izraelin se po mbështesin hapur demonstratat. Ai gjithashtu udhëzoi prokurorin e përgjithshëm të vendit dhe prokurorët provincialë që të tregojnë “zero tolerancë” ndaj të ndaluarve. Ndërkohë, grupet e të drejtave të njeriut flasin edhe për të paktën 25 të vrarë në Iran gjatë nëntë ditëve të para të protestave që nisën në pazarin e Teheranit, për shkak të rënies së vlerës së monedhës dhe inflacionit në rritje, dhe që janë përhapur tani në të gjithë vendin. Irani është ndërkohë edhe nën presion ndërkombëtar, me presidentin amerikane Donald Trump që kërcënoi të premten se do të vijë në ndihmë të protestuesve në iran nëse forcat e sigurisë do ti qëllojnë ata. Në përgjigje, lideri suprem i Iranit, ajatollahu Ali Khamenei, premtoi se vendi nuk do të gjunjëzohet para armikut.