Pirro Vëngu i kaloi stafetën e drejtimit të ministrisë së mbrojtjes, Ermal Nufit. Ceremonia zyrtare u krye në Garnizonin “Skënderbej”, nga ku Vëngu pati një mesazh falenderimi për kryeministrin Edi Rama dhe premtoi angazhim të plotë politik, si deputet i qarkut të Vlorës. “Ta dini se kalimi im me kohë të plotë si deputet i Vlorës, nuk e përjetoj si largim nga misioni i sigurisë kombëtare, përkundrazi, siguria e Shqipërisë sot mbrohet si në terren, ashtu edhe në tryeza të tjera diplomatike e politike, si me uniformë, ashtu edhe në aleanca të qëndrueshme. Në detyrën e re plot mirënjohje për mbështetjen nga kryeministri Rama, do ta mbaj gjithmonë me vete frymën e kësaj ministrie, qartësi në qëllim, disiplinë në veprim dhe besnikëri ndaj interesit kombëtar.” Ministri i ri i mbrojtjes, Ermal Nufi renditi prioritetet e tij në krye të ministrisë së mbrojtjes, mes të cilave rijetëzimi i industrisë ushtarake dhe modernizimi i Forcave të Armatosura.