Norvegjia do të dislokojë ushtrinë për të mbrojtur infrastrukturën e saj të naftës dhe gazit kundër ndonjë akti të mundshëm sabotazhi, pasi disa vende thanë se nga dy gazsjellës rusë për në evropë, ka rrjedhje gazi në Baltik dhe dyshohet se ata janë sulmuar. Rrjedhjet e gazit si rezultat i një sabotazhi të dyshuar u zbuluan në gazsjellësit Nord Stream, të martën, dhe menjëherë i zhytën tregjet e energjisë në kaos dhe rritën shqetësimet e sigurisë. Norvegjia është tani furnizuesja më e madhe me gaz në evropë dhe një furnizuese e rëndësishme me naftë po ahstu. Ajo ka më shumë se 90 platforma nafte dhe gazi në det, pjesa më e madhe e të cilave janë të lidhura me një rrjet tubacionesh gazi që shtrihen për rreth 9 mijë kilometra. “Ushtria do të jetë e pranishme në instalacionet norvegjeze të naftës dhe gazit”, tha kryeministri Jonas Gahr Stoere në një konferencë për shtyp. Një sulm i mundshëm sidoqoftë – shtoi ai – do të menaxhohet në bashkëpunim me aleatët. Norvegjia është një vend anëtar i NATO-s. Në det, marina do të dislokohet të mbrojë infrastrukturën atje ndërsa në tokë, do të rritet prania e policisë rreth saj. NATO dhe Bashkimi Evropian ndërkohë kanë vendosur theksin tek nevoja e mbrojtjes së infrastrukturës kritike dhe kanë paralajmëruar një reagim të fortë dhe unik në rast se do të kishte më shumë sulme.