Komisioneri i lartë për zgjerim dhe fqinjësi, Oliver Varhelyi, i cili e filloi turin e tij në Ballkanin Perëndimor të hënën, në Serbi, u ndal këtë të mërkurë në Shqipëri. Nga Rinasi, Komisioneri Oliver Varhelyi ka përmendur zgjedhjet parlamentare të 25 Prillit, duke theksuar se pa një parlament të plotë nuk mund të ecet drejt Bashkimit Europian. Varhelyi: Sa i përket rezultatit e kam ndjek, dhe mendoj pas fushatës së zjarrtë janë rezultatet e qarta dhe zyrtare dhe ne duam të shohim gjithë parregullsitë qoftë edhe blerjen e votës do të duhet të presim rezultatet përfundimtare dhe që kuvendi i ri të nisë punën, pa një parlament të plotë s’mund të ecet për në BE. Gjatë fjalës së tij komisioneri Oliver Varhelyi është pyetur edhe për çështjen e “Non Papers”, diskutimet e të cilës, në Bruksel synojnë rishikim të kufijve mes Kosovës dhe Serbisë. Varhelyi: Është si një stinë ku ne po shohim që kanë lulëzuar dokumente të tilla. Është interesante kur dëgjojmë këto lajme, edhe pse jemi të bindur që nuk janë të vërteta. Po të ishin të vërteta do ishim të shqetësuar, sepse ripërcaktimi i kufijve e dimë të gjithë se ku na çon. Kush është serioz nuk do ta vinte një gjë të tillë për të diskutuar dhe aq më tepër në këtë rajon ku jemi.