Me hyrjen në fuqi të liberalizimit të vizave për shtetasit e Kosovës, spanja sqaroi se e njeh pasaportën e Kosovës dhe se qytetarët kosovarë mund të udhëtojnë lirisht dhe pa pengesa drejt këtij vendi. Por, ministri spanjoll i punëve të jashtme, Hoze Manuel Albares, përsërit për mediat spanjolle se njohja e pasaportës nuk nënkupton edhe njohjen e pavarësisë. Albares thotë se pas hyrjes në fuqi të liberalizimit të vizave për Kosovën, edhe spanja duhet të vendoset në një linjë me shtetet e tjera të BE-së. “Spanja duhet të përshtatet ashtu si pjesa tjetër e shteteve që nuk e njohin Kosovën. Ndaj, filluam të pranojmë pasaportat kosovare. Edhe një herë dua të përsëris se kjo nuk nënkupton njohje të Kosovës apo sovranitetit të saj. Ne jemi pesë shtete të Bashkimit Evropian që nuk e njohim Kosovën dhe të pestë i pranojmë pasaportat e tyre”, tha ai. Në intervistë, ministri Albares thotë se Spanja e mbështet dialogun mes Kosovës dhe Serbisë dhe se nuk do të pengojë afrimin e prishtinës me BE-në. Sipas tij, spanja nuk mund të pretendojë se Kosova nuk ekziston, pasi është një territor në ballkanin perëndimor dhe është pjesë e samiteve të organizuara nga Bashkimi Evropian. Spanja është mes pesë shteteve të BE-së që nuk e njohin pavarësinë e Kosovës, ku bëjnë pjesë edhe Greqia, Qiproja, Sllovakia dhe Rumania. Megjithatë, të gjitha këto shtete njohin dokumentet e udhëtimit të lëshuara nga autoritetet shtetërore në Kosovë.