Vjedhja e identitetit është një nga shqetësimet më kryesore që lidhet me krimin kibernetik. Kjo gjë nuk ka të bëjë vetëm me faktin e shtirjes si dikush që nuk je por me keqpërdorimin e të dhënave në mënyrë të paligjshme. Personat që bëjnë krim në fushën e internetit mund të përdorin të dhënat e viktimës për të kryer krime dhe vetë mbetet i pacënuar. Sipas ekspertëve, moshat më të cënuara nga krimi kibernetik janë nga 18 deri në 29 vjeç, sepse kjo kategori personash qëndron më shumë kohë online dhe nuk kanë shumë informacion për rreziqet. Ekspertët thonë se Shqipëria është vulnerabël ndaj sulmeve të mundshme të kësaj natyre, që mund të shkojnë deri aty sa të cënojnë edhe sigurinë kombëtare. Sulmet dhe hakerimet mund të kenë pasoja shumë të rënda duke çuar në shantazhe, bullizëm, pedofili, përfshirjen e siteve pornografike dhe madje edhe dëme të mëdha ekonomike të bizneseve. Vitin e kaluar policia arrestoi një 20-vjeçar që kishte arritur të piratonte mbi 3000 adresa në rrjetet sociale. Ai ishte ekspert kompjuterik edhe pse i pashkolluar. Ditën punonte si lavazhier, ndërsa natën si "hacker".