Në Policinë e Shtetit do të ketë një njësi të re me fokus të posaçëm krimet mjedisore. Kështu u shpreh ministri i Punëve të Brendshme, Besfort Lamallari, në një takim me drejtuesit vendorë te Policisë së Shtetit në 12 qarqe. Bashkë me drejtorin e Përgjithshëm të Policisë së Shtetit, Skënder Hita, ministri ka kërkuar një qasje më proaktive për zjarret, ndryshe nga e shkuara. Ndërkohë drejtori i Përgjithshëm i Policisë së Shtetit, Skënder Hita, kërkoi nga drejtuesit vendorë më shumë angazhim për sigurinë publike, sigurinë rrugore dhe sigurinë detare. “Çdo komponent i sigurisë kërkon angazhim dhe përgjegjshmëri, dhe rezultatet varen nga mënyra se si secili prej nesh e përmbush detyrën”, deklaroi kreu i policisë. Kur flasim për performancë, tha Hita, nuk flasim vetëm për rezultatet që arrijmë në terren. Performanca, sipas tij, është edhe mënyra e sjelljes me qytetarët, mënyra si komunikimit me ta dhe mënyra si komunikohet me median.