Nikola Gratteri, prokurori që udhëheq luftën e italisë kundër krimit të organizuar, ka mësuar të jetojë në rrezik konstant. Ndaj edhe kur iu kërkua nga një ekip gazetarësh të BBC, të jepte një intervistë, e konfirmoi vendin e takimit vetëm 20 minuta përpara. Ekipi e priti jashtë një gjykate në kalabri, ku ai po zhvillon procesin më të madh gjyqësor kundër mafias, që nga vitet 1980. Më shumë se 330 të dyshuar po dëshmojnë atje dhe 70 prej tyre janë dënuar tashmë. Gratteri, shoqërohet nga një eskortë prej pesë makinash policie. “Kur unë isha në shkollë, shihja njerëz të vdekur nëpër rrugë”, fillon rrëfimin ai. Njeriu që kryeson listën e zezë të mafias më të fuqishme në itali, ‘Ndrangheta-s, ia ka dedikuar të gjithë karrierën e tij goditjes së grupit. Ndaj edhe që nga viti 1989 ai po jeton me një nivel të lartë sigurie, pas kërcënimeve që kishte marrë. Në 1992, prokurori Giovanni Falcone, u hodh në erë nga një bombë që ishte vendosur në një autostradë afër Palermos, nga mafia siciliane, Cosa Nostra.