Presidenti amerikan, Donald Trump, tha se do të dërgonte emisarin e tij të posaçëm, Steve Ëitkoff, në Moskë për t’u takuar me presidentin rus, Vladimir Putin, lidhur me një marrëveshje paqeje me Ukrainën, të cilën Kievi thotë se është i gatshëm “ta shtyjë përpara”, ndërsa disa pika “të ndjeshme” janë ende duke u shqyrtuar. Pas një dite me diplomaci të vrullshme, që përfshiu takime mes delegacioneve në disa vende në Lindjen e Mesme dhe në Evropë, u duk se po arrihej përparim drejt një marrëveshjeje për t’i dhënë fund konfliktit më të madh dhe më të përgjakshëm në Evropë që nga Lufta e Dytë Botërore. “Plani fillestar i Paqes me 28 pika, që është hartuar nga SHBA-ja, është përsosur me kontributin shtesë nga të dyja palët dhe kanë mbetur vetëm disa pika të mospajtimeve”, shkroi Trump në rrjetet sociale. “Me shpresën për finalizimin e këtij plani paqeje, kam udhëzuar të dërguarin tim të posaçëm, Steve Ëitkoff, që të takohet me presidentin Putin në Moskë, dhe në të njëjtën kohë, sekretari i Ushtrisë, Dan Driscoll, do të takohet me ukrainasit”, shtoi ai. Sipas një zëdhënësi të Ushtrisë amerikane, Driscoll u takua të martën në Abu Dabi me një delegacion rus, në një përpjekje për të reduktuar dallimet për propozimin e paqes që administrata Trump ka hartuar pas bisedimeve mes zyrtarëve amerikanë dhe ukrainas në Gjenevë. Ukrainasit kanë udhëtuar po ashtu për në Abu Dabi për më shumë bisedime me Driscoll dhe zyrtarë të tjerë amerikanë, raportuan CBS Neës dhe Financial Times. Edhe vetë Kremlini tha se Ëitkoff do të qëndrojë në Moskë javën e ardhshme. “Sa i përket Ëitkoff, mund të them se është arritur një marrëveshje paraprake që ai të vijë në Moskë javën e ardhshme”, tha këshilltari për politikë të jashtme i presidentit rus, Yuri Ushakov. Ndërkaq, Trump në postimin e tij në rrjetet sociale tha se pret që të takohet me udhëheqësit e Ukrainës dhe Rusisë kur marrëveshja të jetë në fazën finale. “Mezi pres ta takoj presidentin Zelensky dhe presidentin Putin së shpejti, por VETËM kur marrëveshja t’i ketë dhënë fund kësaj lufte dhe të jetë FINALE ose në fazat e saj të fundit”, shkroi Trump.