Një aksident me teleferikun e një resorti skish në Spanjë ka lënë të plagosur 10 persona, duke përfshirë dy vajza që janë në kujdes intensiv. Resorti Astún në Pirenejet spanjolle, ku ndodhi incidenti, u mbyll pasi shërbimet e shpëtimit shkuan me urgjencë në vendngjarje. Një kabllo e teleferikut ishte liruar dhe disa kabina kishin rënë në tokë duke hedhur skiatorët në dëborë. Të tjerë skiatorë mbetën të varur në ajër me kokat poshtë. Kryeministri Pedro Sánchez tha se ishte "i tronditur" nga lajmi i incidentit. Raportet e para thanë se rreth 30 persona ishin lënduar, por mediat lokale më vonë raportuan se 17 kishin nevojë për ndihmë mjekësore. Ambulancat dhe helikopterët dërguan në spital disa nga të plagosurit. Dy vajza, të dyja të moshës 18 vjeç, janë në kujdes intensiv, shkruan gazeta spanjolle El Pais. Sipas transmetuesit shtetëror TVE, një ingranazh, në njërin skaj të ashensorit ishte prishur dhe një pjesë e strukturës që e mbante atë u shemb, duke shkaktuar lirimin e një kablloje dhe rënien e disa kabinave. Dhjetra njerëz që mbetër të varur në teleferikun 15 metra të lartë u ndihmuan të zbresin. Haime Pelegri, i cili ishte në teleferik tha për BBC se një kabllo u lirua para se karriget në anën e tij të strukturës të fillonin binin. “Ishte shumë e frikshme, por gjithcka ndodhi shumë shpejtë”, tha ai, duke shtuar se ambulancat dhe helikopterët mbërritën në vendngjarje brenda 15 minutash. Zyrtarët nuk kanë përcaktuar ende se cili ishte shkaku i aksidentit. Resorti Astún, i cili është i njohur për skiatorët spanjollë, ndodhet në rajonin e Aragonit në malet Pirenej, afër kufirit me Francën.