Programi Botëror i Ushqimit i OKB-së thotë se "një turmë njerëzish të uritur" kanë hyrë me forcë në një magazinë ushqimesh në Gazën qendrore. Raportohet se dy persona janë vrarë dhe disa të tjerë janë plagosur në incident, tha programi, duke shtuar se ende po konfirmohen detajet. Pamjet video nga agjencia e lajmeve AFP treguan turma njerëzish që hynin me forcë në depon Al-Ghafari në Deir Al-Balah dhe merrnin thasë me miell dhe kuti me ushqim ndërsa dëgjoheshin edhe të shtëna. Nuk ishte menjëherë e qartë se nga vinin të shtënat. Në një deklaratë, Programit Botëror të Ushqimit, u tha se nevojat humanitare në Gaza ishin "jashtë kontrollit" pas një bllokade pothuajse tre-mujore izraelite që u lehtësua javën e kaluar. Programi tha se furnizimet me ushqim ishin dërguar në depo për shpërndarje. Programi shtoi: "Gaza ka nevojë për një rritje të menjëhershme të ndihmës ushqimore. Kjo është e vetmja mënyrë për të garantuar që njerëzit nuk do të vdesin nga uria". Programi Botëror i Ushqimit tha se kishte "paralajmëruar vazhdimisht për kushtet alarmante në terren, si dhe për rreziqet e imponuara nga kufizimi i ndihmës humanitare për njerëzit e uritur që kanë nevojë të madhe për ndihmë". Autoritetet izraelite thanë të mërkurën se 121 kamionë që i përkisnin OKB-së dhe bashkësisë ndërkombëtare që transportonin ndihma humanitare, përfshirë miell dhe ushqime, hynë në Gaza. Izraeli filloi të lejonte një sasi të kufizuar ndihme në Gaza javën e kaluar. Megjithatë, e dërguara e OKB-së për Lindjen e Mesme, Sigrid Kaag, i tha Këshillit të Sigurimit të OKB-së se kjo ishte "e krahasueshme me një varkë shpëtimi pasi anija është fundosur" kur të gjithë në Gaza po përballeshin me rrezikun e urisë. Një grup i diskutueshëm i mbështetur nga SHBA-ja dhe Izraeli - Fondacioni Humanitar i Gazës (GHF) - u krijua gjithashtu si një sistem privat i shpërndarjes së ndihmave. Ai përdor kontraktorë sigurie amerikanë dhe anashkalon OKB-në, e cila thotë se grupi është jo funksional dhe joetik.