Nëntë gra janë gjetur të vdekura pranë Johanesburgut brenda vetëm dy muajve, duke ngjallur frikën se një vrasës serial mund të jetë duke vepruar i lirë. Policia e Afrikës së Jugut njoftoi të enjten se trupi i një gruaje të nëntë ishte zbuluar në Ekurhuleni, në lindje të Johanesburgut. Të nëntë trupat janë gjetur në këtë zonë gjatë dy muajve të fundit dhe policia po heton nëse vdekjet janë të lidhura me njëra-tjetrën. Më herët, zyrtarët deklaruan se ngjashmëritë midis tetë vrasjeve të para ishin "mjaft shqetësuese" aq sa për të lëshuar një paralajmërim publik. Këto zbulime kanë nxitur një hetim të gjerë dhe kanë ringjallur shqetësimin lidhur me femicidin dhe krimet e dhunshme në Afrikën e Jugut. Policia tha se zbulimi i trupit të fundit, herët të enjten, "do t'i shtohet hetimeve për vdekjet e grave në Ekurhuleni". Policia paralajmëroi qytetarët që të mos shpërndajnë fotografi të trupave në rrjetet sociale. Një kalimtar e gjeti trupin e gruas pranë një kantieri ndërtimi dhe njoftoi policinë. Gruaja e paidentifikuar dukej se ishte rreth të 30-tave dhe kishte një plagë të dukshme me thikë në brinjë, ndërsa fyti i saj dukej ishte prerë.