Një vit mbas tërmetit të 21 shtatorit ka përfunduar në bashkinë e Durrësit rindërtimi i banesave individuale të shkatërruara nga ky tërmet. Në vazhdim, behet e ditur se pritet të rindërtohen edhe banesat e shkatërruara nga tërmeti i nëntorit. Sipas bashkisë, shtëpitë u ndërtuan dhe do të ndërtohen me kushte më të mira se të mëparshmet dhe me standarte sigurie. Aktualisht janë 58 shtëpi që janë rindërtuar pasi u dëmtuan rëndë nga tërmeti i shtatorit, ndërkohë që pritet të nisë puna për rindërtimin e 904 banesave individuale, të dëmtuara në mënyrë të pariparueshme nga tërmeti i nëntorit. Procesi i rindërtimit vijon në bashkinë e Durrësit, ku 10.610 familje kanë përfituar nga granti i rikonstruksionit DS1-DS2-DS3 dhe shumë prej tyre janë në përfundim të riparimeve të banesave të tyre. Ndërkohë janë 36 pallate të miratuar deri tani, të cilat është vendosur se do të rindërtohen në të njejtin vend.