Një aksident tragjik është regjistruar në rrugën nacionale Çermë–Divjakë, në fshatin Çermë Shkumbin, ku një person humbi jetën dhe pesë të tjerë mbetën të plagosur. Sipas informacioneve paraprake, dy automjete, një BMW dhe një Opel, janë përplasur kokë më kokë. Si pasojë, ka humbur jetën 39-vjeçari Barjam Kaçani, i cili udhëtonte me automjetin Opel. Ndërkohë, pesë personat që ndodheshin në BMË kanë mbetur të plagosur, mes tyre tre fëmijë, të cilët fatmirësisht ndodhen jashtë rrezikut për jetën. Të lënduarit janë transportuar me ambulancë drejt Spitalit të Lushnjës për të marrë ndihmën e nevojshme mjekësore. Ndërkohë, policia rrugore po punon për zbardhjen e plotë të shkaqeve të aksidentit tragjik që i mori jetën 39-vjeçarit, baba i tre fëmijëve. Po ashtu, një tjetër aksident i rëndë është regjistruar paraditen e kësaj të diele në aksin Rrëshen–Skuraj, në vendin e quajtur Fang, ku dy automjete u përplasën kokë më kokë, duke lënë të plagosur shtatë persona. Sipas informacioneve paraprake, në njërin prej automjeteve u desh ndërhyrja e ekipeve të emergjencës për të nxjerrë dy persona që kishin mbetur të bllokuar brenda.