Tensionet mes rivalëve të hershëm, Indisë dhe Pakistanit, janë përshkallëzuar të enjten, pasi Nju Delhi ndërmori një ofensivë diplomatike kundër Islamabadit, duke e fajësuar atë për një sulm vdekjeprurës që vrau 26 persona, kryesisht turistë, në rajonin e diskutueshëm të Kashmirit. India e akuzoi Pakistanin të mërkurën në mbrëmje se po mbështet “terrorizmit përgjatë kufirit” dhe mori masa diplomatike, përfshirë uljen e nivelit të marrëdhënieve diplomatike, pezullimin e një marrëveshjeje të rëndësishme për ndarjen e ujërave dhe mbylljen e pikëkalimit kryesor tokësor me Pakistanin. Pakistani i hodhi poshtë akuzat, ndërsa një grup militant i panjohur më parë, që e quan veten Qëndresa e Kashmirit, mori përgjegjësinë për sulmin. Islamabadi tha se do të përgjigjet ndaj veprimeve të Indisë dhe se do të mbledhë Komitetin e Sigurisë Kombëtare, i përbërë nga zyrtarë të lartë civilë dhe ushtarakë. Marrëdhëniet diplomatike mes dy vendeve kanë qenë të brishta edhe më parë, veçanërisht pas vendimit të Indisë për t’i hequr Kashmirit statusin gjysëmautonom në vitin 2019. India dhe Pakistani administrojnë secila nga një pjesë të Kashmirit, por të dyja e duan për vete të gjithë territorin.