Kryebashkiaku i Devollit, Eduard Duro është paraqitur këtë të enjte në Prokurorinë e Posaçme Antikorrupsion. Ai është marrë nën hetim nga SPAK me akuzën e “shpërdorimit të detyrës” dhe këtë të enjte u mbajt seanca e radhës në Gjykatën e Posaçme. Duro akuzohet nga Prokuroria e Posaçme se licencoi një karburant që ishte pa leje. Ai u kallëzua në SPAK nga një subjekt tjetër privat i licencuar në sektorin e tregtimit me pakicë të karburanteve në Bashkinë e Devollit. Veç Duros, janë nën hetim edhe pesë punonjës të bashkisë së Devollit, mes tyre specialistë të taksave dhe sekretari i përgjithshëm i bashkisë. Kryebashkiaku ka mohuar akuzat. Ai thotë se ka zbatuar ligjin duke firmosur autorizimin e dhënë nga zyra e tatim-taksave, pavarësisht se subjekti kishte ndërtuar pa leje. Duro është kryebashkiaku i radhës me llogari të hapura me drejtësinë. Të mërkurën, GJKKO dënoi ish kryebashkiaken e Patosit, Rajmonda Balilaj, ndërsa prokuroria e posaçme pyeti kryebashkiakune Kolonjës, Erion Isai.