NATO po shqyrton mundësinë e krijimit të një pozicioni të përhershëm të të dërguarit të posacëm në Kiev, si pjesë e angazhimit të saj afatgjatë ndaj Ukrainës në mesin e luftës së vazhdueshme me Rusinë, thanë zyrtarë perëndimorë dhe ndihmës të kongresit amerikan të njohur me këtë çështje. Plani, që pritet të shpallet në samitin e NATO-s në Uashington në korrik nëse miratohet, përfshin krijimin e një posti "përfaqësues të lartë civil" në Ukrainë. Ky rol do të ishte i ngjashëm me atë që NATO kishte në Afganistan gjatë pranisë së saj gati dy dekadash atje. I dërguari i ri do të koordinojë mbështetjen e NATO-s për Ukrainën, duke përfshirë dërgimin e ndihmës ushtarake nga vende të ndryshme perëndimore. Ky pozicion i profilit të lartë do të përcillte gjithashtu një mesazh të fortë politik për Ukrainën dhe Rusinë në lidhje me angazhimin e NATO-s për të mbështetur Kievin pasi Ukraina kërkon anëtarësimin e përhershëm në NATO për të forcuar mbrojtjen e saj kundër agresionit ushtarak rus. Masa e propozuar vjen në kuadër të debateve të vazhdueshme midis vendeve anëtare të NATO-s nëse do të vendosin trupat e tyre në territorin ukrainas. Ndërsa ky vendim mund të përshpejtojë trajnimin dhe pajisjen e ushtrisë ukrainase, ai gjithashtu rrezikon të përshkallëzojë situatën në një konfrontim më të gjerë mes Perëndimit dhe Rusisë, duke çuar potencialisht edhe në një përshkallëzim bërthamor. Javën e kaluar, presidenti rus Vladimir Putin paralajmëroi Perëndimin për "pasoja të rënda" pasi Shtetet e Bashkuara dhe disa fuqi të mëdha evropiane autorizuan Ukrainën të godiste objektivat ushtarake brenda Rusisë me armë të furnizuara nga Perëndimi.