Qeveria propozon një tjetër reformë te institucionet e trajtimit të pronave. Sipas një projektligji të hedhur për konsultim publik, reforma e re shkrin Agjencinë Shtetërore të Kadastrës me Agjencinë e Trajtimit të Pronave, duke krijuar Agjencinë Shtetërore të Pronës. Relacioni shoqërues thotë se projektligji ka për qëllim riorganizimin e kuadrit institucional dhe funksional që rregullon administrimin e pronës së paluajtshme, duke adresuar problematikat e akumuluara si pasojë e fragmentarizimit të kompetencave, mbivendosjes së përgjegjësive dhe koordinimit ndërmjet institucioneve përgjegjëse për administrimin dhe regjistrimin. Projektligji synon të krijojë kushte për vendimmarrje më të shpejtë dhe më të koordinuar. Ky riorganizim, thuhet në propoziim, eliminon boshllëqet ligjore dhe ndërthurjet e kompetencave, që mund të krijojnë hapësira për interpretime apo praktika administrative të ndryshme. Projektligji ruan kompetencat ekzistuese të Kadastrës dhe të Agjencisë së Trajtimit të Pronës, duke i përfshirë ato në strukturën e Agjencisë së rë. Objektivat kryesore që synohen të arrihen përmes këtij projektligji janë ndërtimi i një sistemi të integruar, forcimi i menaxhimit dhe kontrollit të pronës shtetërore dhe përmbyllja e proceseve të pronësisë kalimtare, si legalizimet, tokat bujqësore dhe kompensimin e ish pronarëve.