Gjatë fushatës zgjedhore, Presidenti i SHBA-së, Donald Trump, premtoi t'i jepte fund konflikteve më të nxehta në botë dhe të sillte paqe globale, por gati pesë muaj më vonë, me Izraelin që sulmon Iranin dhe gjakderdhjen në Gaza dhe Ukrainë që vazhdojnë, këto premtime rezultojnë boshe. Aleati i SHBA-së, Izraeli, goditi dhjetëra objektiva iraniane në një sulm dramatik dhe shumëplanësh të enjten, që analistët thonë se kërcënon të shndërrohet përfundimisht në një luftë rajonale të përgjithshme. Sulmet duket se janë një goditje për Trump, i cili e kishte shtyrë vazhdimisht kryeministrin izraelit Benjamin Netanyahu të mos e sulmonte Iranin, megjithëse vetë presidenti kishte kërcënuar ta bombardonte vendin e Gjirit nëse bisedimet bërthamore do të dështonin. "Diplomacia Trumpiane është një nga viktimat e para të këtyre sulmeve", tha Brett Bruen, një ish-këshilltar i politikës së jashtme i Presidentit Demokrat Barack Obama. "Ai është stërmunduar edhe për t'iu afruar një armëpushimi në Gaza, e jo më paqes në çdo konflikt të madh. Irani dukej më premtuesi dhe Netanyahu thjesht e prishi atë", thotë ai. Sulmet janë gjithashtu një shuplakë për Steve Ëitkoff, i dërguari i Trump për Lindjen e Mesme dhe ndihmës i ngushtë i tij, i cili ka punuar intensivisht me negociatorët iranianë drejt një zgjidhjeje diplomatike për të frenuar programin bërthamor të Iranit. Ëitkoff ishte përpjekur pa sukses ta bindte Netanyahun të qëndronte i duruar ndërsa negociatat SHBA-Iran vazhdonin. Këto bisedime kanë ngecur tani.