Administrata Biden u përmbajt nga kërcënimi me sanksione shtesë pas raporteve se turqia planifikon të marrë një dërgesë të dytë nga rusia të sistemit të mbrojtjes raketore S-400. Turqia fillimisht e bleu sistemin S-400 në 2017-ën, duke i zhytur marrëdhëniet e saj me SHBA në krizë. Si rezultat i marrëveshjes, administrata Trump e dëboi Turqinë nga programi i F-35ave dhe më vonë vendosi edhe sanksione mbi industrinë turke të mbrojtjes. SHBA druan se sistemi i fuqishëm i radarëve S-400 mund ta lejojë Rusinë të spiunojë avionët e avancuar ushtarakë F-35. Por, pas lajmit për dërgesën e dytë të pritshme, uashingtoni ishte thuajse i heshtur. Në një konferencë për shtyp, zëdhënësi i departamentit të shtetit Ned Price, i kërkoi turqisë të mos angazhohet më tej me sektorin rus të mbrojtjes. Price refuzoi madje edhe të tregonte nëse një S-400 i ri do të shtyjë administratën Biden të rimendojë planet për ti shitur avionët F-16 Turqisë. Agjencia ruse e lajmeve TASS raportoi se Rusia dhe Turqia kishin nënshkruar një kontratë për një regjiment të dytë S-400 në Turqi. Burimet turke të mbrojtjes ndërkohë hodhën poshtë pretendimet ruse se ishte nënshkruar një kontratë shtesë duke thënë se sistemi i dytë S-400 ishte pjesë e marrëveshjes fillestare.