Koreja e Veriut ka pretenduar se ka lëshuar një raketë të re balistike me rreze të mesme veprimi me një kokë hipersonike e cila "do të përmbajë me siguri çdo rival në rajonin e Paqësorit". Lëshimi i realizuar të hënën, i pari i Phenianit në dy muaj, erdhi ndërsa Sekretari i Shtetit i SHBA Antony Blinken ishte në Seul për bisedime me disa nga udhëheqësit kryesorë të Koresë së Jugut. Armët hipersonike janë më të vështira për t'u gjurmuar dhe rrëzuar, pasi ato janë në gjendje të udhëtojnë me më shumë se pesë herë shpejtësinë e zërit. Koreja e Veriut pretendon se raketa e saj fluturoi 12 herë më shpejt se zëri, për rreth 1500 km. Ushtria e Koresë së Jugut më herët tha se raketa fluturoi 1,100 km përpara se të binte në det, duke shtuar se seuli "dënon fuqishëm" këtë "akt të qartë provokimi". Koreja e Veriut ka testuar më parë raketa hipersonike. Fotot e publikuara nga KCNA treguan se raketa e së hënës i ngjante asaj që u lëshua në prill të vitit të kaluar. Por Pheniani pretendon se raketa e re hipersonike përmban një "sistem të ri të kontrollit të fluturimit dhe drejtimit" dhe një motor të bërë me fibra karboni. Udhëheqësi i vendit Kim Jong Un tha se testimi i së hënës "u tregoi qartë rivalëve atë që vendi po bën dhe se Koreja e Veriut është plotësisht e gatshme të përdorë çdo mjet për të mbrojtur interesat e saj legjitime". Ndërsa armët hipersonike kanë ekzistuar për dekada, vitet e fundit janë zhvilluar raketa të reja që janë shumë më të shpejta dhe të manovrueshme, mund të rihyjnë në atmosferë shumë më shpejt dhe të kryejnë manovra shmangjeje.