Presidenti rus Vladimir Putin, bëri të ditur në momentin e fundit se nuk do të jetë i pranishëm në turqi, për bisedimet e paralajmëruara me ukrainën. Por kë ka dërguar ai për të negociuar paqen...Pak më shumë se një orë para mesnatës së 14 majit, me orën e Moskës, Kremlini publikoi emrat e atyre që do të merrnin pjesë. I pari është Vladimir Medinsky, ndihmës i Kremlinit. Ai edhe do të kryesojë delegacionin. I lindur në Ukrainën Sovjetike, Medinsky ndihmoi në drejtimin e bisedimeve të paqes të vitit 2022, të cilat në fund dështuan. I arsimuar në Institutin Shtetëror të Marrëdhënieve Ndërkombëtare të Moskës, Medinsky është autor i një libri të ri shkollor, historie, i cili pasqyron pikëpamjen historike të Putinit: krenari për arritjet e superfuqisë Bashkimit Sovjetik, indinjatë për poshtërimet e rënies së Bashkimit Sovjetik dhe lëvdata për "rilindjen" e Rusisë nën sundimin e ish-spiunit të KGB-së, që nisi në ditën e fundit të vitit 1999. Ai është kryetar i Shoqërisë Historike Ushtarake Ruse ultra-patriotike. Pjesë e delegacionit do të jetë edhe Mikhail Galuzin, zëvendësministër i jashtëm që mbikëqyr marrëdhëniet me Komonuelthin e Shteteve të Pavarura, një grupim ish-republikash sovjetike. Igor Kostyukov, drejtor i inteligjencës ushtarake ruse, i njohur si GRU, është pjesë e delegacionit po ashtu. Alexander Fomin, zëvendësministër i mbrojtjes, është po ashtu në stamboll pasi ka marrë pjesë edhe më parë, në bisedimet e vitit 2022 për Ukrainën. Përveç kësaj, Putin miratoi edhe një listë ekspertësh për negociatat që përbëhet nga Alexander Zorin, zëvendësshef i parë i informacionit i drejtorisë së Shtabit të Përgjithshëm, Yelena Podobreyevskaya, zëvendësshefe e drejtorisë së Kremlinit për politikën humanitare dhe Alexei Polishchuk, drejtor në ministrinë e jashtme që merret me Bjellorusinë, Ukrainën dhe Moldavinë. Përzgjedhja e delegacionit rus për bisedimet e para të drejtpërdrejta me Ukrainën, pas më shumë se tre vjetësh, po shihet nga shumë analistë si një degradim i qëllimshëm diplomatik.