Policia italiane arrestoi një murgeshë të njohur për punën e saj në burg dhe 24 persona të tjerë të enjten, si pjesë e një hetimi ndaj Ndrangheta-s në qytetin verior të Brescias, thanë për Reuters tre burime me njohuri të drejtpërdrejta për këtë çështje. Ata thanë se motra Anna Donelli, një vullnetare në burgun San Vittore të Milanos, dyshohet për bashkëpunim mafioz dhe se ka vepruar si ndërmjetëse midis grupit kriminal dhe anëtarëve të bandës së tij të burgosur. Murgesha, 57 vjecare, është gjithashtu e njohur për shërbimin e saj në lagjet e rrënuara të Milanos. Në shkurt ajo ishte një nga fitueset e "Panetones së Artë", një çmim vjetor qytetar milanez. Një deklaratë për shtyp e policisë tha se dy politikanë vendas u arrestuan gjithashtu dhe se 1.8 milionë euro ishin sekuestruar në operacion. Deklarata nuk përmendi asnjë nga personat e shënjestruar në operacion. Të dyshuarit akuzohen për krime të ndryshme, duke përfshirë bashkëpunim mafioz, blerje votash, armëmbajtje pa leje, pastrim parash, shpërndarje droge dhe faturim të rremë, shtohet në deklaratën e policisë. Grupi i dyshuar ishte i lidhur me lëshimin e faturave në vlerë prej 12 milionë eurosh për transaksione inekzistente që u mundësonin sipërmarrësve bashkëpunëtorë të ulnin të ardhurat e tyre dhe të shmangnin taksat në këmbim të një komisioni të paguar për mafiozët. Me origjinë nga rajoni i varfër jugor i Kalabrisë, 'Ndrangheta' ka evoluar duke u bërë organizata më e fuqishme mafioze e Italisë dhe është përhapur në të gjithë Evropën dhe pjesën tjetër të botës, duke depërtuar në të ashtuquajturin krim të jakave të bardha.