Një stuhi e fuqishme ngriti një mur të madh pluhuri që u përplas mbi qytetin e Feniksit, në SHBA, duke errësuar qiellin, duke verbuar drejtuesit e mjeteve, duke ndërprerë energjinë elektrike dhe duke anuluar fluturimet në një nga aeroportet më të ngarkuara të vendit. Stuhia e pluhurit, e njohur edhe si habub, prodhohet nga erëra të forta që marrin me vete pluhurin, zakonisht në zona të sheshta. Shi i rrëmbyeshëm pasoi stuhinë. Stuhia bëri që të anuloheshin fluturimet në Aeroportin Ndërkombëtar të Feniksit, Sky Harbor, dhe shkaktoi disa dëme në çatinë e terminalit. Më shumë se 60,000 shtëpi mbetën ndërkohë pa energji elektrike. Feniksi ka qenë më i thatë se zakonisht gjatë sezonit të musoneve, ndërsa pjesë të Arizonës juglindore dhe veri-qendrore kanë pasur një sasi të konsiderueshme shiu dhe kjo sipas meteorologëve ka ndikuar në fenomenin e fundit. Vetë banorët rrëfyen se stuhia e pluhurit bëri që pemët të lëkundeshin ndërsa pluhuri i imët kishte hyrë edhe brenda shtëpive. Shikueshmëria në rrugë ishte thuajse zero dhe zyrtarët paralajmëruan njerëzit të qëndrojnë jashtë rrugëve ose të ndalen menjëherë në vend. Stuhitë e pluhurit nuk janë të pazakonta në sezonin e musoneve në Arizona, por kjo stuhi pati një fuqi shumë të madhe. Era e fortë e stuhisë mblodhi rërën e shkretëtirës duke ndërtuar një mur të lëvizshëm pluhuri që u ngjit me mijëra metra lart në vetëm pak sekonda. Muri i pluhurit të një habubi që vjen nga larg mund të shihet, por kur ai të arrijë tek njerëzit është shumë vonë për të kërkuar shpëtim. Ngjarja në Feniks vjen pas një stuhie pluhuri në fundjavë në Nevada që ndërpreu Burning Man, një festival i përvitshëm në Black Rock City.