Udhëheqësi suprem iranian Ali Khamenei dërgoi ministrin e tij të jashtëm në Rusi të enjten me një letër për presidentin rus Vladimir Putin, në përpjekje për të fituar mbështetjen e Moskës përpara një raundi të dytë të negociatave bërthamore me Shtetet e Bashkuara të amerikës. Presidenti amerikan, Donald Trump, e ka kërcënuar vazhdimisht Iranin me bombardime dhe shtrirje të tarifave ndaj vendeve të treta që blejnë naftën e tij, nëse Teherani nuk arrin një marrëveshje me Uashingtonin për programin e tij të diskutueshëm bërthamor. Shtetet e Bashkuara kanë zhvendosur madje avionë shtesë luftarakë në rajon. Shtetet e Bashkuara dhe Irani zhvilluan bisedime në Oman fundjavën e kaluar, të cilat të dyja palët i përshkruan si pozitive dhe konstruktive. Përpara një raundi të dytë bisedimesh që do të zhvillohet në Romë këtë fundjavë, Ministri i Jashtëm Abbas Araqchi tha të mërkurën se e drejta e Iranit për pasurimin e uraniumit nuk është e negociueshme.