Volodymyr Zelensky thotë se lëshimet territoriale për t'i dhënë fund luftës së nisur nga Vladimir Putin do të kërkonin mbështetjen e një referendumi në Ukrainë. Megjithatë, presidenti ukrainas u tha mediave franceze se një lëvizje e tillë “nuk është alternativa më e mirë sepse kemi të bëjmë me Putinin dhe do të ishte një fitore për të nëse ai merr një pjesë të territorit ukrainas”. "Ukraina kurrë nuk do të heqë dorë nga territoret e saj, sepse ky do të ishte një sulm ndaj Kushtetutës," tha ai, duke shtuar se çdo lëvizje e tillë "është një pyetje shumë, shumë e vështirë". Vendimet për integritetin territorial të Ukrainës nuk mund të merren nga presidenti, por nga populli ukrainas, tha ai në intervistën me gazetat franceze Le Monde, AFP dhe L'Equipe. "Kjo bie ndesh me Kushtetutën e Ukrainës," tha ai, "ata që janë në pushtet nuk kanë të drejtë të heqin dorë nga territoret e tyre. Që kjo të ndodhë, populli ukrainas duhet ta dëshirojë atë," shtoi ai, pa përjashtuar mundësinë e një referendum për këtë çështje. Pas dy vitesh e gjysmë lufte, Rusia dhe Ukraina janë shumë larg negociatave, por sondazhet e fundit në Ukrainë kanë treguar një ndryshim të opinionit mes popullatës për perspektivën e bisedimeve. Një sondazh i kryer në maj nga Instituti Ndërkombëtar i Kievit për Sociologji zbuloi se një e treta e ukrainasve, ose 32 për qind, do të pranonin dhënien e territorit në këmbim të paqes dhe pavarësisë, krahasuar me 26 përqind që ishte kjo shifër në shkurt të këtij viti dhe 9 përqind në shkurt të 2023. Më shumë se gjysma, 55 përqind, janë ende kundër dhënies së territorit Rusisë nëse ajo do t'i jepte fund luftës, por kjo ka shënuar një rënie krahasuar me 74 përqind që ishte në dhjetor 2023. Ndërkohë, mediat ukrainase kanë raportuar muajin e kaluar se 44 për qind e ukrainasve mendojnë se ka ardhur koha për të filluar negociata me rusinë.