Ndër gratë kandidate të Partisë Demokratike, dhe një nga ato që spiksin më shumë në garën zgjedhore, është Grida Duma, jo vetëm për pamjen e saj tërheqëse, por edhe për mënyrën e artikulimit dhe retorikës që përdor në daljet publike. Ajo vjen në këtë garë me synimin e qartë për t’u rikthyer në Parlament si deputete, ashtu siç ishte deri pak më shumë se dy vjet parë kur opozita dorëzoi mandatet në grup. Grida Duma, është një zë i fortë në radhët e PD gjatë viteve të fundit, duke pasur një karriere që ka njohur vetëm ngjitje. Me një përvojë të gjatë si lektore dhe pedagoge në shkencat sociale, Duma ka gati një dekadë e angazhuar në radhët e PD, duke mbajtur detyra të ndryshme në vite. Fillimisht ajo mbajti postin e zv. ministres së Integrimit nga viti 2011-2013 si krahu i djadhtë i ministres Majlinda Bregu në atë kohë, kur PD ishte ende në pushtet, ndërsa në 2014 u zgjodh Sekretare për Marrëdhëniet me Publikun. Karriera e saj politike që ishte vetëm në hapat e parë, kulmoi me kandidimin për kryetare të bashkisë së Durrësit në 2015 përballë Vangjush Dakos, që kërkonte një mandat të tretë në atë kohë. Ndërsa në zgjedhjet e 2017 ajo ishte një ndër deputetët e PD dalë nga listat shumë emërore dhe nga Janari 2019 e në vazhdim është anëtare e kryesisë së demokratëve, e duke konfirmuar në këtë mënyrë se është një nga njerëzit më të besuar të kryetarit të selisë blu, Lulzim Basha. Në këto zgjedhje Grida Duma kërkon votat e qytetarëve në zonën e Kavajës, Rrogozhinës dhe Rrethinave, ku ka ndërmarrë një fushatë intensive me takime të shpeshta me banorët.