Përfundimi i punës së komisionit për rrjedhjen e të dhënave nga sistemi TIMS nuk prodhoi asnjë surprizë. PS dhe PD nuk gjetën dakordësinë as për raportin final dhe hetimet 4-mujore mbyllen me dy drafte, që do t’i dorëzohen Kuvendit në seancë plenare. Raportet kanë dallime thelbësore, duke nisur që nga gjetjet për ndërhyrjet në këtë sistem, deri te përgjegjësitë. Demokratët theksojnë në draftin e tyre se ndërhyrja në sistem ka qenë e organizuar, e qëllimshme dhe të dhënat kanë përfunduar në duart e krimit të organizuar. Sipas opozitës, rezulton se punonjës të Policisë së Shtetit, të cilët kanë për detyrë të ruajnë dhe administrojnë të dhënat e sistemit TIMS, e kanë përdorur të drejtën e aksesit për t’ua vënë në dispozicion këto të dhëna elementëve të krimit të organizuar, të cilët kanë interes të veçantë për t’u njohur me hyrje-daljet e shtetasve nga territori i Shqipërisë, urdhërat e arrestit, ndalimit, kërkimit, masat ndaluese nga shtetet e huaja, vendimet gjyqësore penale nga autoritetet shqiptare apo të huaja dhe automjetet me të cilat lëvizin shtetas të caktuar.