Nafta ruse po vazhdon ta gjejë rrugën e saj drejt blerësve në mbarë botën. Por edhe ata që kalojnë ditët e tyre duke gjurmuar lëvizjen e saj nëpër oqeane, nuk munden shpesh herë të gjejnë saktësisht se kush e transporton atë, shkruan CNN. Ndërsa sanksionet perëndimore kundër Rusisë janë përshkallëzuar për shkak të pushtimit të saj në Ukrainë, më shumë anije i janë bashkuar një flote ekzistuese të cisternave misterioze, të gatshme për të lehtësuar eksportet e naftës të Rusisë. Ekspertët e industrisë vlerësojnë se kjo flotë ‘hije” përbëhet nga rreth 600 anije, ose rreth 10% të numrit global të cisternave të mëdha. Dhe numrat vazhdojnë të rriten. Kush zotëron dhe operon shumë nga këto anije mbetet një enigmë. Ndërsa tregtimi i naftës ruse u bë më kompleks gjatë vitit të kaluar, shumë transportues perëndimorë tërhoqën shërbimet e tyre. Lojtarë të rinj, të panjohur u futën në lojë, me kompani guaska në Dubai ose Hong Kong të përfshira në disa raste. Disa blenë anije nga evropianët, ndërsa të tjerë përdorën anije të vjetra, që mund të ishin nisur edhe për skrap. "Ju keni hyrë më thellë në artet e errëta," i tha CNN një ekzekutiv i lartë në një firmë tregtare nafte, duke iu referuar këtij rrjeti të errët.