Roli i Suedisë në NATO është i rëndësishëm mbi të gjitha për dy faktorë. Së pari, ajo do të jetë qendër për aktivitete në pjesën veriore të Evropës, ku mund të dërgohen shumë armë dhe trupa dhe anasjelltas, duke e bashkuar Suedinë me vendet nordike, Danimarkën, Finlandën, Islandën dhe Norvegjinë, në të njëjtën organizatë ushtarake për herë të parë në historinë moderne. Së dyti, Suedia shihet si garantuese e qëndrueshme e sigurisë, vecanërisht kur vjen fjala për tri vendet baltike, Estoninë, Letoninë dhe Lituaninë, të cilat tani do të jenë të lidhura me pjesën tjetër të rajonit nordik. Ajo do të jetë vendimtare edhe në mbrojtjen e çdo cepi të tokës së shteteve baltike menjëherë, sepse është në gjendje të japë mbështetje të shpejtë detare dhe ajrore. Përparësia mbase më e qartë e anëtarësimit të Suedisë në NATO është se Deti Baltik do të bëhet një “liqeni i NATO-s”, sepse aleanca ushtarake në thelb e rrethon enklavën ruse, Kaliningard, dhe i kontrollon të dyja anët e Gjirit të Finlandës i cili të çon drejt qytetit të dytë më të madh të Rusisë, Shën Petersburg. Një aspekt tjetër të cilin e theksojnë shumë zyrtarë të NATO-s si vlerë shtesë janë armët të cilat Suedia do t’i sjellë në aleancë. Konsiderohet se ky vend i ka dy burime të klasit botëror: së pari, nëndetëset të cilat mund t’i kontrollojnë pjesë të mëdha të Detit Baltik, duke barazuar çdo lëvizje të Rusisë. Dhe pastaj avionët luftarakë të prodhuar nga vetë Suedia, SAAB JAS Gripen. E tërë flota nordike e avionëve luftarakë do t’i ketë mbi 250 prej tyre dhe Stokholmi po shqyrton edhe dërgimin e disa avionëve në Ukrainë. Për sa i takon industrisë së mbrojtjes së suedisë, vendi është një nga eksportuesit më të mëdhenj të armëve në botë. Përveç avionëve luftarakë, baza industriale e armëve të suuedisë është e fuqishme edhe në fusha të tjera si, sensorët, armët, armët antitank të këmbësorisë dhe automjetet e blinduara. Por, ajo ka edhe disa dobësi të mëdha. Ushtria suedeze me 38.000 trupa cilësohet relativisht e vogël dhe mund t’i duhet ta rrisë shumë numrin, megjithëse kjo do t’i kushtonte.