Të paktën tre persona janë vrarë dhe shumë rajone ukrainase janë përballur me ndërprerje të energjisë të martën, si pasojë e sulmeve të Rusisë që raportohet të kenë qenë ndër më intensivet që prej fillimit të luftës. Edhe Polonia fqinje aktivizoi avionët e vet luftarakë për të mbrojtur hapësirën ajrore në kohën e sulmeve, bëri të ditur ushtria polake përmes një postimi në X. “Rusia është duke sulmuar sërish infrastrukturën tonë të energjisë. Si rezultat, për ndërprerje të energjisë është raportuar në disa rajone ukrainase”, tha Ministria ukrainase e Energjisë përmes një postimi në Telegram. Zjarre raportohet të kenë shpërthyer në disa rajone si rezultat i “sulmeve masive me raketa dhe dronë”, bëri të ditur operatori i energjisë Ukrenergo, ndërsa temperaturat ulen çdo ditë e më shumë. Në mesin e të vrarëve është raportuar të jetë një fëmijë katërvjeçar ndërsa disa fëmijë të tjerë janë mes të plagosurve. Rusia ka intensifikuar sulmet edhe në qytetin jugor të Ukrainës, Odesa në ditët e fundit. Sipas autoriteteve ukrainase këto janë përpjekje për të shkatërruar plotësisht logjistikën detare. Sulmet e fundit kanë ardhur pas negociatave të zhvilluara në fundjavë, të cilat Shtetet e Bashkuara i mbajtën ndaras me delegacionet ruse dhe ukrainase në Majami, në kuadër të përpjekjeve për t’i dhënë fund luftës së nisur nga Moska në shkurt 2022. I dërguari i posaçëm amerikan, Steve Ëitkoff tha se bisedimet kanë qenë “konstruktive” por nuk ka shenja të ndonjë përparimi.