Ndërsa bota mban zi për vdekjen e Papa Françeskut, Papës së parë nga Amerika Latine, në moshën 88-vjeçare, një kapitull i butë nga jeta e tij e hershme po tërheq edhe një herë vëmendjen; dashuria e tij në fëmijëri për një vajzë të quajtur Amalia Damonte. Para se t'ia kushtonte jetën Zotit dhe të niste rrugëtimin për t'u bërë Papa i 266-të i Kishës Katolike, Jorge Mario Bergoglio dikur ëndërronte për një të ardhme tjetër. Si një djalë 12-vjeçar duke u rritur në lagjen Flores të Buenos Airesit, i riu Bergoglio ra në dashuri me vajzën fqinje Amalia Damonte. Miqësia e tyre e fëmijërisë lulëzoi në diçka më të thellë, duke e shtyrë atë t'i shkruante një letër Amalias duke i propozuar martesë. Në letrën tashmë të famshme, Bergoglio hapi zemrën e tij, duke shkruar: "Nëse nuk martohem me ty, do të bëhem prift". Amalia, e cila jetonte vetëm katër dyer larg, kujtoi momentin me dashuri në disa intervista pasi Bergoglio u zgjodh Papë në 2013. “Ai ishte i rritur, i pjekur, një djalë i mrekullueshëm”, tha ajo për mediat argjentinase. "Kemi kërcyer, kemi luajtur në trotuare dhe parqe. Ishte një kohë shumë e bukur. Ne ishim të dy të dhembshur dhe kujdeseshim për të varfrit, ishim shpirtra të ngjashëm".