Vrasja e 65-vjeçarit Viktor Bardhi këtë të enjte në Mirditë dyshohet se mund të jetë vijimësi e një konflikti të gjatë mes familjeve Reçi, Gjini dhe Bardhi, që prej vitit 2016 është shoqëruar me një seri vrasjesh dhe atentatesh. Gjithçka nisi më 9 shtator 2016, me ekzekutimin e Saimir Jakut në një lokal në Rrëshen. Ish-drejtori i linjës së Tensionit të Lartë për veriun në OSHEE u qëllua me kallashnikov ndërsa po pinte kafe. Më 28 prill 2017, në Romë të Italisë, u vra 43-vjeçari Gasper Reçi. Autoritetet dyshuan se ekzekutimi i tij ishte hakmarrje për vrasjen e Jakut. Vetëm disa muaj më pas, më 6 shtator të 2017-ës, në Belgjikë u ekzekutua Kreshnik Gjini, nipi i Saimir Jakut. Përplasjet vijuan në vitet pasuese. Më 13 gusht 2019, Armando Gjini u vra në Rrëshen, në sy të dy fëmijëve të tij, ndërsa më 7 janar 2020 Kastriot Reçi u ekzekutua me një plumb snajperi përpara lokalit të tij. Në shtator të po atij viti, Preng Gjini i shpëtoi një atentati në Tiranë, pasi në automjetin e tij ishte vendosur lëndë plasëse.