Presidenti francez, Emanuel Makron mblodhi krerët e partive të koalicionit të majtë, fituesit e zgjedhjeve të fundit parlamentare në përpjekje për të gjetur emrin e kryeministrit të ri të vendit. Zgjedhjet e parakohshme në fillim të korrikut kanë shkaktuar një ngërç politik, pasi asnjë parti nuk është në gjendje që të formojë një shumicë të qartë në Asamblenë Kombëtare. Fronti i Ri Popullor, që përbëhet nga katër parti, ka propozuar në këtë post një 37-vjeçare, emër i panjohur që punon si ekonomist me statusin e nëpunës civil. Megjithatë, ka pak gjasa që propozimi i koalicionit fitues të marrë miratimin e Makron, pasi 37-vjeçarja nuk është testuar përmes votës në zgjedhje, por është propozimi i dakordësuar nga katër partitë politike të koalicionit. Presidenca franceze tha se është në kërkim të një kandidati që të mund të sigurojë votëbesimin e një shumice të qëndrueshme në Asamblenë Kombëtare dhe jo një emër, qeveria e të cilit mund të rrëzohet që në mocionin. Megjithatë, ekstremistët e majtë këmbëngulin në kandidaturën e 37-vjeçares dhe i kërkojnë Makronit që të respektojë rezultatin e zgjedhjeve dhe vullnetin e francezëve.