Donald Trump tha se është afër vendimit nëse do të nisë “një sulm masiv” kundër Iranit, në një shkallë më të madhe se sulmet e deritanishme në konfliktin disamujor me Teheranin. Duke folur për faqen e lajmeve Axios, presidenti amerikan tha: “Po shqyrtoj një sulm masiv. Më të madh se kurrë më parë. Jam afër marrjes së një vendimi. Jemi të gjithë gati për të.” Trump i bëri komentet e tij ndërsa çmimet e naftës u rritën përsëri mbi 100 dollarë për një fuçi dhe mes indikacioneve se mund të rriten edhe më shumë. Trump pranoi se një vendim i tillë do të kishte pasoja, por tha se ende nuk kishte marrë një vendim përfundimtar. Izraeli “do të bashkohej me ne brenda dy minutash nëse do t’ia kërkoja”, tha ai, duke shtuar: “Sidoqoftë nuk kemi nevojë për askënd.” Orë më vonë, SHBA-të kryen natën e 13-të radhazi me sulme ndaj Iranit që zgjatën më shumë se dy orë. Media shtetërore iraniane raportoi shpërthime përgjatë ngushticës së Hormuzit në Qeshm dhe Bandar Abbas, si dhe në veriperëndim të vendit dhe në Teheran. Megjithatë, sulmet duket se përputheshin gjerësisht me fushëveprimin dhe intensitetin e atyre që SHBA ka kryer gjatë përshkallëzimit më të fundit të dhunës. Komentet e Trump pasuan kërcënimin e mëparshëm për "ndëshkim të madh ushtarak" kundër Iranit dhe Huthive, pas sulmeve të milicisë jemenase të mbështetur nga Irani ndaj dy cisternave të naftës të Arabisë Saudite në Detin e Kuq. Mbretëria e Bashkuar njoftoi një ditë më parë se po tërhiqte përkohësisht stafin diplomatik nga Irani të mërkurën, dhe ushtria gjermane njoftoi se do të tërhiqte dy anije nga Deti i Kuq. Qytetet izraelite hapën vend strehimet kundër bombave, ndërsa departamenti amerikan i shtetit paralajmëroi amerikanët që jetojnë në rajon se fluturimet mund të anulohen.