Së paku 10 persona janë vrarë dhe 35 të tjerë janë plagosur nga një sulm rus në një supermarket në Kostiantinivka, një qytet në rajonin lindor Donjeck të Ukrainës, thanë zyrtarët ukrainas. Ministri i Brendshëm i Ukrainës, Ihor Klymenko, njoftoi në Telegram për numrin e rritur të viktimave. “Terroristët rusë goditën një supermarket të zakonshëm dhe një zyrë postare. Ka njerëz nën gërmadha. Operacioni për shpëtim ka filluar dhe do të bëjmë gjithçka për t’i shpëtuar ata”, tha presidenti ukrainas, Volodymyr Zelensky, në rrjetin social X. Më herët, Zelensky kishte thënë: “për momentin kishte raporte për katër persona të vrarë dhe të paktën 24 të plagosur. Rusia do të mbahet përgjegjëse për këtë terror dhe ne do të bëjmë gjithçka për t’u siguruar që bota të vazhdojë ta mbështetë Ukrainën për t’u mbrojtur dhe për t’i shpëtuar njerëzit tanë”. Vadym Filashkin, shef i administratës ushtarake rajonale, shkroi në Telegram se në këtë sulm u përdor një raketë Kh-38. “Ky është një tjetër sulm që në shënjestër kishte një vend ku mblidhen njerëzit. Një akt tjetër i terrorit nga rusët”, shkroi Filashkin. Pamjet nga vendi i ngjarjes tregonin tym të zi duke dalë nga objekti i supermarketit. Shërbimet emergjente janë duke vazhduar operacionet e shpëtimit, tha Filashkin. Forcat ruse kanë nën kontroll pjesë të mëdha të rajonit të Donjeckut. Pjesët që janë nën kontrollin e Ukrainës përballen shpesh me raketa dhe sulme ajrore. Ky rajon është një prej zonave ku zhvillohet luftimet më të ashpra. Ndërkohë, zyrtarët ukrainas raportuan se gjashtë persona kanë humbur jetën nga sulmet ruse në katër rajone të tjera.