Kryeparlamentarja Lindita Nikolla thirri mbledhjen e konferencës së kryetarëve më 29 shtator në kryesinë e kuvendit, ku do të merren në shqyrtim dy kërkesat e opozitës për konçesionet e shëndetësisë dhe rrjedhjen e të dhënave personale. Mbledhja do të çelet me shqyrtimin e kërkesës së 45 deputetëve të opozitës ku demokratët kërkojnë ngritjen e një komisioni hetimor me 11 deputetë nga mazhoranca dhe opozita për rrjedhjen e të dhënave personale të qytetarëve nga listat e patronazhistëve të Partisë Socialiste, publikimin e databazës së pagave, targave të makinave dhe ndërhyrjet në sistemin Tims. Kërkesa u prezantua nga deputeti Ervin Salianji i cili u shpreh publikisht se parlamenti duhet që për një afat gjashtë mujor të dalë në një raport hetimor për çështjen e databazave të patronazhistëve.